चिनियाँ राष्ट्रपतिले भने– नेपाल–भारतको सीमा विवादमा चीन पर्न चाहँदैन, दुई पक्षले समाधान गर्नुहोस्

काठमाडौ । चिनियाँ राष्ट्रपति सी चिनफिङले लिपुलेक मार्गसम्बन्धी नेपाल–भारत सीमाविवादमा चीन तटस्थ रहने स्पष्ट पारेका छन्। प्रधानमन्त्री केपी शर्मा ओलीसँग शनिबार सम्पन्न भेटवार्तामा राष्ट्रपति सीले उक्त विवाद आपसी समझदारीबाट समाधान गर्नुपर्नेमा जोड दिएका हुन्।

परराष्ट्र सचिव अमृतबहादुर राईका अनुसार प्रधानमन्त्री ओलीले भारत र चीनबीच हालै लिपुलेक मार्ग प्रयोग गरी गरिएको सीमा व्यापारसम्बन्धी समझदारीप्रति आपत्ति जनाएका थिए। प्रधानमन्त्री ओलीले उक्त भूभाग नेपालको क्षेत्राधिकारभित्र पर्ने भन्दै चिन्ता व्यक्त गरेका थिए।

जवाफमा राष्ट्रपति सीले लिपुलेक मार्ग परम्परागत रूपमा प्रयोग हुँदै आएको पुरानो नाका भएको उल्लेख गर्दै भने, “नेपाल–भारत सीमासम्बन्धी विवाद दुई पक्षबीच आपसी संवादमार्फत समाधान हुनुपर्छ। चीनले यसमा कुनै पक्षको समर्थन गर्दैन।”

राष्ट्रपति सीको यो भनाइले चीन उक्त विवादमा नलाग्ने स्पष्ट सन्देश दिएको देखिएको छ। साथै, नेपाल–भारतबीचको सीमासम्बन्धी सम्वेदनशील विषयमा चीनको परिपक्व र तटस्थ कूटनीतिक दृष्टिकोण प्रकट भएको विश्लेषण गरिएको छ।