साउन महिनामा निर्जीवन बीमा कम्पनीहरूले ४ अर्ब ३१ करोडको व्यापार, सगरमाथा लुम्बिनी अग्रस्थानमा

काठमाडौं । चालु आर्थिक वर्ष २०८२/८३ को साउन महिनामा नेपालका निर्जीवन बीमा कम्पनीहरूले एकै महिनामा ४ अर्ब ३१ करोड ८४ लाख रुपैयाँभन्दा बढीको बीमा शुल्क आर्जन गरेका छन्। नेपाल बीमा प्राधिकरणले सार्वजनिक गरेको तथ्यांक अनुसार, कुल २ लाख १५ हजार २८५ वटा बीमालेख बिक्रीबाट यो बीमा शुल्क आर्जन गरिएको हो।

व्यवसायको आधारमा सगरमाथा लुम्बिनी इन्स्योरेन्स (सलिको) साउन महिनामा सबैभन्दा अगाडि देखिएको छ। कम्पनीले मात्र एक महिनामा ४५ करोड ५४ लाख रुपैयाँ बराबरको बीमा शुल्क संकलन गरेको छ। सलिकोले साउनमा २१ हजार १५१ वटा बीमालेख बिक्री गरेको छ।

दोस्रो स्थानमा सिद्धार्थ प्रिमियर इन्स्योरेन्स रहेको छ। कम्पनीले साउनमा ४१ करोड ७९ लाख ७४ हजार रुपैयाँ बीमा शुल्क आर्जन गरेको छ भने २२ हजार ५०३ वटा बीमालेख बिक्री गरेको हो। तेस्रो स्थानमा रहेको शिखर इन्स्योरेन्स कम्पनीले ४१ करोड ५५ लाख ११ हजार रुपैयाँ बराबरको बीमा शुल्क आर्जन गरेको छ। शिखरले साउन महिनामा २५ हजार २३७ वटा बीमालेख बिक्री गरेको देखिन्छ।

अन्य प्रमुख कम्पनीहरूको प्रदर्शन हेर्ने हो भने, ओरियण्टल इन्स्योरेन्सले ४१ करोड ३७ लाख २३ हजार, हिमालयन एभरेष्टले ३६ करोड ५२ लाख ४५ हजार, एनएलजी इन्स्योरेन्सले ३४ करोड ३१ लाख २० हजार, आइजीआई प्रुडेन्सियलले ३३ करोड ८१ लाख ९० हजार, र नेको इन्स्योरेन्सले ३२ करोड १ लाख रुपैयाँ बीमा शुल्क आर्जन गरेका छन्। यी कम्पनीहरूले क्रमशः ३ हजार ८७९, २१ हजार ७५७, १५ हजार ७५८, १५ हजार ९४३ र २१ हजार ६९३ वटा बीमालेख बिक्री गरेका छन्।

त्यस्तै, युनाइटेड अजोड इन्स्योरेन्सले साउन महिनामा २९ करोड ६७ लाख, नेपाल इन्स्योरेन्सले २३ करोड ६ लाख, सानिमा जिआइसीले २२ करोड ३६ लाख, एनईसी (नेपाल इन्भेष्टमेन्ट) ले २० करोड ७१ लाख, राष्ट्रिय बीमा कम्पनीले १६ करोड २७ लाख, र प्रभू इन्स्योरेन्सले १२ करोड ७१ लाख रुपैयाँ बराबरको बीमा शुल्क संकलन गरेका छन्।