साउन महिनामा जीवन बीमा कम्पनीको १९ अर्ब ६५ करोडको व्यापार, नेपाल लाइफ अग्रस्थानमा

काठमाडौं । चालु आर्थिक वर्ष २०८२/८३ को साउन महिनामा नेपालका जीवन बीमा कम्पनीहरूले कुल १९ अर्ब ६५ करोड ३३ लाख रुपैयाँभन्दा बढीको बीमा शुल्क आर्जन गरेका छन्। नेपाल बीमा प्राधिकरणले शुक्रबार सार्वजनिक गरेको तथ्यांक अनुसार बीमा कम्पनीहरूले एकै महिनामा २ लाख ८४ हजार १७६ वटा नयाँ बीमालेख जारी गरेका छन्। कुल बीमा शुल्कमध्ये ३ अर्ब २७ करोड २४ लाख रुपैयाँ नयाँ व्यवसाय (प्रथम बीमा शुल्क) बाट आर्जन गरिएको हो भने १६ अर्ब २३८ करोड ८ लाख रुपैयाँ नविकरण मार्फत संकलन गरिएको हो।

बीमा व्यवसायमा नेपाल लाइफ इन्स्योरेन्स कम्पनी अग्रस्थानमा रहेको छ। कम्पनीले साउन महिनामात्रै ६ अर्ब १९ करोड २५ लाख ६९ हजार रुपैयाँ बीमा शुल्क आर्जन गरेको छ। यसमा १ अर्ब ३ करोड ९० लाख रुपैयाँ नयाँ व्यवसाय र ५ अर्ब १५ करोड ३४ लाख रुपैयाँ नविकरणमार्फत आएको हो। कम्पनीले सो अवधिमा ७५ हजार ९५३ वटा बीमालेख बिक्री गरेको छ। दोस्रो स्थानमा रहेको नेशनल लाइफ इन्स्योरेन्स कम्पनीले २ अर्ब ४१ करोड ४५ लाख ३६ हजार रुपैयाँ बीमा शुल्क संकलन गरेको छ। कम्पनीले साउनमा २७ हजार ३७१ वटा बीमालेख बिक्री गरेको छ, जसबाट ४२ करोड ३७ लाख रुपैयाँ नयाँ व्यवसाय र १ अर्ब ९९ करोड ७ लाख रुपैयाँ नविकरणबाट आर्जन गरिएको हो।

तेस्रो स्थानमा लाइफ इन्स्योरेन्स कर्पोरेशन (एलआईसी) नेपाल रहेको छ, जसले साउन महिनामा २ अर्ब ३ करोड ९९ लाख रुपैयाँ बराबरको बीमा शुल्क आर्जन गरेको छ। कम्पनीले ४ हजार ११२ वटा बीमालेख बिक्री गरेको छ, जसमा २१ करोड ३५ लाख रुपैयाँ नयाँ व्यवसाय र १ अर्ब ८२ करोड ६४ लाख रुपैयाँ नविकरणबाट आएको हो। त्यसैगरी, हिमालयन लाइफले पनि २ अर्ब २ करोड ८१ लाख रुपैयाँ बीमा शुल्क आर्जन गरेको छ। कम्पनीले ४ हजार १७८ बीमालेख बिक्री गरेको छ र साउन महिनामा २३ करोड ८० लाख नयाँ व्यवसाय तथा १ अर्ब ७९ करोड १ लाख नविकरण शुल्क संकलन गरेको हो।

अन्य बीमा कम्पनीहरूको साउन महिनाको बीमा शुल्क आर्जन हेर्ने हो भने सूर्यज्योतिले १ अर्ब २४ करोड ५२ लाख, एशियन लाइफले ९४ करोड ८६ लाख, सिटिजन लाइफले ८५ करोड ६४ लाख, सानिमा रिलायन्सले ८१ करोड ९५ लाख, आइएमई लाइफले ६७ करोड ५ लाख, प्रभु महालक्ष्मी लाइफले ६१ करोड ६८ लाख, रिलायबल नेपालले ५८ करोड १७ लाख र मेट लाइफले ५३ करोड ९९ लाख रुपैयाँ बीमा शुल्क आर्जन गरेका छन्। त्यस्तै, राष्ट्रिय जीवन बीमा कम्पनीले ४३ करोड ३९ लाख र सन नेपाल लाइफले ३६ करोड ५२ लाख रुपैयाँ बीमा शुल्क संकलन गरेका छन्।

नेपाल बीमा प्राधिकरणका अनुसार, जीवन बीमा क्षेत्रमा देखिएको यो वृद्धिले आम नागरिकमा बीमा प्रति चासो र भरोसा बढ्दो अवस्थामा रहेको स्पष्ट संकेत गरेको छ। नविकरणमार्फत आर्जित बीमा शुल्कको उच्च अंशले ग्राहक सन्तुष्टि र दीर्घकालीन सम्बन्ध सुदृढ भइरहेको संकेत गर्दछ।