चन्द्रकुवेर खापुङ नेपाल प्रहरीको नयाँ महानिरीक्षक नियुक्त

काठमाडौं । सरकारले चन्द्रकुवेर खापुङलाई नेपाल प्रहरीको महानिरीक्षक (आईजीपी) मा नियुक्त गरेको छ।

शुक्रबार बसेको मन्त्रिपरिषद् बैठकले खापुङलाई भदौ १९ गतेदेखि लागू हुने गरी महानिरीक्षकमा नियुक्त गर्ने निर्णय गरेको हो।

हालका प्रहरी महानिरीक्षक दिपक थापा भदौ १८ गते राति १२ बजेदेखि अवकाशमा जाँदैछन्।

प्रधानमन्त्री केपी शर्मा ओली शनिबारदेखि चीन भ्रमणमा निस्कनु हुने भएकाले त्यसअघि नै बसेको मन्त्रिपरिषद् बैठकले ३२औं प्रहरी महानिरीक्षक को टुंगो लगाएको हो।

तेह्रथुममा जन्मिएका खापुङ २०५२ सालमा प्रहरी निरीक्षक हुँदै सेवा प्रवेश गरेका थिए। ३० वर्षे सेवा अवधि कायम रहे उनी आउँदो कात्तिक २७ गते अवकाशमा जाने छन्। खापुङ हालका महानिरीक्षक थापासँगै भर्ना टोली (ब्याच) मा सेवा प्रवेश गरेका थिए तर वैकल्पिक उम्मेदवारका रूपमा भर्ना भए।

इमान्दार र बेदाग छवि भएका चन्द्रकुवेर

खापुङलाई प्रहरी संगठनमा इमान्दार, बेदाग र निष्कलङ्ग अधिकृतको रूपमा चिनिन्छ।

इन्सपेक्टरदेखि डीआईजीसम्म विभिन्न जिम्मेवारी सम्हाल्दै आएका खापुङले बेलबारी, दरबारमार्ग, काठमाडौं अपराध अनुसन्धान कार्यालय, कोशी प्रदेश कमान्ड, प्रधानमन्त्रीको सुरक्षा प्रमुख, युएन मिसन (हाइटी), तथा प्रहरी प्रधान कार्यालयको कर्मचारी प्रशासनको नेतृत्व गरेका थिए। उनले इटाली, कोरिया, भियतनाम र चीनबाट सुरक्षा तालिम पनि लिएका छन्।

उनी सम्भवत: प्रहरी इतिहासकै दोस्रो सबैभन्दा कम कार्यकाल भएका आईजीपी हुनेछन्। सेवा अवधिका आधारमा उनी आगामी कात्तिक २६ गते अनिवार्य अवकाशमा जानेछन्। यसअघि तोरण शमशेर जबरा ३ दिनका लागि आईजीपी बनेका थिए।

उनको सेवानिवृत्तिपछि एआईजीपी सिद्धिविक्रम शाह, दानबहादुर कार्की र राजन अधिकारी आईजीपी पदको प्रतिस्पर्धामा रहनेछन्।