करदाताको संख्या ७० लाख पुग्यो, एकै वर्ष थपिए पौने ८ लाख

काठमाडौ । नेपालमा करदाताको संख्या ७० लाख नजिक पुगेको छ।

अर्थ मन्त्रालयले सार्वजनिक गरेको आर्थिक वर्ष २०८१/८२ को तथ्यांकअनुसार असार मसान्तसम्म देशभर कुल ६९ लाख ९९ हजार ३५० करदाता रहेका छन्। तीमध्ये २० लाख ६० हजार ७५८ व्यवसायिक स्थायी लेखा नम्बर भएका छन् भने ४९ लाख २ हजार ७२२ व्यक्तिगत करदाता रहेका छन्। त्यस्तै, कर कट्टी गर्ने निकायका लागि प्रयोग हुने डब्लु प्यान लिनेको संख्या ३५ हजार ८७० पुगेको छ, जुन अघिल्लो वर्षको तुलनामा २ हजार ५४२ ले बढी हो।

तथ्यांकअनुसार व्यक्तिगत करदाताको संख्या एक वर्षमा ६ लाख ५४ हजार १८ ले वृद्धि भएको छ। अघिल्लो वर्ष ४२ लाख ४८ हजार ७०४ व्यक्तिगत करदाता रहेका थिए। यसैगरी, व्यवसायिक करदाताको संख्या पनि २ लाख ८ हजार ४३० ले बढेको छ। आर्थिक वर्ष २०८०/८१ मा व्यवसायिक करदाता १९ लाख ४४ हजार १०१ रहेका थिए।

हालसम्म भ्याटमा दर्ता भएका करदाता ३ लाख ५१ हजार पुगेका छन् भने अन्तःशुल्कमा दर्ता भएका करदाता १ लाख २५ हजार छन्। आर्थिक वर्ष २०८१/८२ मा सरकारले कुल १२ खर्ब ८४ अर्ब रुपैयाँ बराबरको कर राजस्व संकलन गरेको छ। यसमा भन्सारबाट ३ खर्ब ७ अर्ब, मूल्य अभिवृद्धि करबाट ३ खर्ब ८६ अर्ब, अन्तःशुल्कबाट १ खर्ब ९४ अर्ब र शिक्षा सेवा शुल्कबाट ४ अर्ब रुपैयाँ संकलन गरिएको हो।

सरकारले गत वर्ष जम्मा १४ खर्ब १९ अर्ब रुपैयाँ बराबरको राजस्व संकलन गरेको छ, जसमा १ खर्ब ३५ अर्ब रुपैयाँ गैरकर राजस्वबाट आएको हो। करदाताको संख्या तथा कर राजस्व संकलनमा देखिएको यो सकारात्मक वृद्धिले मुलुकको राजस्व प्रणाली बलियो हुँदै गएको संकेत गरेको छ।