नेपालको पर्यटनलाई विश्वभर प्रवर्द्धन गर्न टिकटकसँग पर्यटन बोर्डको सम्झौता

काठमाडौं । नेपाल पर्यटन बोर्ड र टिकटकले संयुक्त साझेदारीको घोषणा गरेका छन्। नेपालका भौगोलिक सौन्दर्य, सांस्कृतिक सम्पदा र साहसिक अनुभवलाई विश्वभर प्रचार–प्रसार गर्ने उद्देश्यले गरिएको यो सम्झौता ह्यासट्याग लाइफटाइम एक्सपिरियन्स अभियानमा केन्द्रित रहनेछ।

यस अभियान अन्तर्गत स्वदेशी तथा विदेशी नामी ट्राभल क्रिएटरलाई नेपाल भ्रमणमा निम्त्याइनेछ र उनीहरूले छोटा र आकर्षक भिडियोमार्फत नेपालको सुन्दर प्राकृतिक दृश्य, संस्कृति, चाडपर्व, कला, खानपान तथा स्थानीय परम्परालाई विश्वसामु प्रस्तुत गर्नेछन्। टिकटकमार्फत सार्वजनिक हुने यी कन्टेन्टहरूले नेपालका ‘घुम्नैपर्ने’ गन्तव्य मात्र नभई अझै प्रचारमा नआएका विशेष ठाउँहरूलाई पनि चिनाउने लक्ष्य राखिएको छ।

पर्यटन बोर्डले नेपाल आउने क्रिएटरहरूलाई स्वागत गर्ने र काठमाडौं उपत्यकासहित अन्य प्रमुख गन्तव्यमा उनीहरूको यात्रा सहज बनाउन आतिथ्य, यातायात तथा विज्ञ मार्गदर्शनको व्यवस्था गर्ने जनाएको छ।

नेपाल पर्यटन बोर्डका प्रमुख कार्यकारी अधिकृत दीपकराज जोशीले साझेदारीलाई नयाँ अध्यायको सुरुवात भन्दै यसले नेपाललाई विश्वसामु चिनाउने र बढी पर्यटक आकर्षित गर्ने विश्वास व्यक्त गरे। टिकटकका दक्षिण एसियाका पब्लिक पोलिसी तथा गभर्मेन्ट रिलेसन्स प्रमुख फर्दोस मोत्ताकिनले नेपालका प्राकृतिक तथा सांस्कृतिक सम्पदालाई विश्वभरका प्रयोगकर्तामाझ प्रस्तुत गर्न उत्साहित रहेको बताइन्।

सम्झौता कार्यक्रममा संस्कृति, पर्यटन तथा नागरिक उड्डयन मन्त्री बद्रीप्रसाद पाण्डेले यो साझेदारी अन्तर्राष्ट्रिय प्रवर्द्धनमा मात्र सीमित नभई स्थानीय समुदाय र सिर्जनाकर्ताहरूलाई सशक्त बनाउन सहयोग पुग्ने बताए। उनले यस अन्तर्गत हुने कार्यशाला र क्षमता अभिवृद्धि कार्यक्रमले नेपाली युवा, उद्यमी र कन्टेन्ट क्रिएटरलाई सीप विकासमा योगदान गर्ने उल्लेख गरे।

उनले थपे, “पर्यटन हाम्रो सामाजिक–आर्थिक विकासको मेरुदण्ड हो। यसले रोजगारी सिर्जना गर्छ, साना तथा मझौला व्यवसायलाई सहयोग पुर्‍याउँछ, ग्रामीण समुदायलाई सशक्त बनाउँछ र हाम्रो सांस्कृतिक परम्पराको संरक्षण गर्छ। यो साझेदारीले यी लाभलाई अझ समावेशी र व्यापक बनाउन मद्दत गर्नेछ।”