प्रधानमन्त्री भन्छन्ः हार नखाईकन काम गरे सफलतामा पुगिन्छ

काठमाडौं । प्रधानमन्त्री केपी शर्मा ओलीले निरन्तर परिश्रम, आत्मविश्वास र हार नखाई काम गर्ने व्यक्तिले अन्ततः सफलता हासिल गर्ने बताएका छन्।

सोमबार काठमाडौंमा आयोजित एक कार्यक्रमलाई सम्बोधन गर्दै प्रधानमन्त्री ओलीले युवाहरूलाई आफ्नो रुचि र प्रतिभाको पहिचान गरी निडरताका साथ अघि बढ्न आग्रह गरे।

“दुनियाँमा धेरैले नयाँ सुरुवात युवावस्थामै गरेका छन्,” प्रधानमन्त्री ओलीले भने, “सङ्घर्ष गर्नुपरे पनि हार नखाई निरन्तर काम गर्दै गएमा एकदिन सफलता अवश्य प्राप्त हुन्छ।”

उनले उदीयमान प्रतिभा भएका युवालाई सफलतासँगै आउने घमण्डप्रति सचेत रहन सुझाव दिँदै व्यक्तिगत आत्मविश्वासलाई राष्ट्रिय आत्मविश्वासमा रूपान्तरण गर्नुपर्नेमा जोड दिए।

“सफलताको यात्रामा विनम्रता र निरन्तरको मेहनत अनिवार्य हुन्छ,” उनले भने, “हरेक व्यक्तिले आफ्नो आचरण, मेहनत र गुणस्तरको सम्भावनालाई पहिचान गर्नुपर्छ।”

प्रधानमन्त्री ओलीले युवालाई प्रेरित गर्दै सफलताको शिखरमा पुगेपछि पनि विनम्रता कायम राख्न र आफ्नो मिहिनेत, आचरण र योगदानलाई कहिल्यै नबिर्सन अनुरोध गरे।

कार्यक्रममा विभिन्न क्षेत्रका युवा सहभागी थिए। प्रधानमन्त्रीको सम्बोधनले युवामा आत्मबल, लगनशीलता र देशप्रतिको उत्तरदायित्वलाई अझ प्रगाढ बनाउने विश्वास व्यक्त गरिएको छ।