निर्जीवन बीमा कम्पनीको कारोबार ४४ अर्ब नजिक, शिखर इन्स्योरेन्स अग्रस्थानमा

काठमाडौं । मुलुकका ठूला १४ वटा निर्जीवन बीमा कम्पनीहरूले गत आर्थिक वर्षमा करिब ४४ अर्ब रुपैयाँ बराबरको कारोबार गरेका छन्। नेपाल बीमा प्राधिकरणका अनुसार, २०८१/८२ आर्थिक वर्षमा यी कम्पनीहरूले कुल ४३ अर्ब ९५ करोड ८७ लाख रुपैयाँको व्यवसाय गरेका हुन्, जुन अघिल्लो आर्थिक वर्षको ४१ अर्ब १७ लाख १३ हजार रुपैयाँको तुलनामा वृद्धि भएको हो।

सबैभन्दा बढी कारोबार गर्नेमा शिखर इन्स्योरेन्स पहिलो स्थानमा रह्यो। कम्पनीले ५ अर्ब ७९ करोड ४२ लाख रुपैयाँको बीमा शुल्क संकलन गर्दै ५.९२ प्रतिशत वृद्धि हासिल गर्‍यो। दोस्रो स्थानमा रहेको सगरमाथा लुम्बिनी इन्स्योरेन्सले ५ अर्ब २० लाख रुपैयाँ कारोबार गर्दै ४.४६ प्रतिशत वृद्धि गर्‍यो। तेस्रोमा सिद्धार्थ प्रिमियर इन्स्योरेन्स ४ अर्ब ३१ करोड २ लाख रुपैयाँसहित ३.१८ प्रतिशतको वृद्धि गर्न सफल भयो।

अन्य प्रमुख कम्पनीहरूमध्ये हिमालयन एभरेष्टले १०.१४ प्रतिशत वृद्धि भई ४ अर्ब १० करोड ४ लाख, आईजिआई प्रुडेन्सियलले ५.८९ प्रतिशत वृद्धि भई ३ अर्ब ८६ करोड ५७ लाख, र नेको इन्स्योरेन्सले ४.४८ प्रतिशत वृद्धि भई ३ अर्ब २८ करोड १८ लाख रुपैयाँको कारोबार गरे। एनएलजी इन्स्योरेन्सले २०.०६ प्रतिशतको उच्च वृद्धि भई ३ अर्ब ६ करोड ४८ लाख रुपैयाँको कारोबार गर्‍यो।

यसैगरी, युनाइटेड अजोड २ अर्ब ७८ करोड ३५ लाख (२.०६% वृद्धि), दि ओरियन्टल २ अर्ब ७० करोड ४८ लाख (२५.१४% वृद्धि), सानिमा जिआईसी २ अर्ब ७० करोड ३२ लाख (३.२४% वृद्धि), र नेपाल इन्स्योरेन्स २ अर्ब ३ करोड ७४ लाख (२८.१४% वृद्धि) कारोबारमा पुगेका छन्।

समीक्षा अवधिमा प्रभु इन्स्योरेन्सले १ अर्ब ८६ करोड ९३ लाख रुपैयाँ (५.१४% वृद्धि) संकलन गरेको छ। तर, दुई कम्पनीको कारोबार भने घटेको छ— राष्ट्रिय बीमा कम्पनी १३.४८ प्रतिशतले घटेर १ अर्ब ३७ करोड ९२ लाख र नेशनल इन्स्योरेन्स ११.४४ प्रतिशतले घटेर १ अर्ब ६ करोड १६ लाख रुपैयाँमा पुगेको छ।

बीमा प्राधिकरणका अनुसार, अधिकांश निर्जीवन बीमा कम्पनीहरूले दोहोरो अंकको वृद्धि हासिल गर्न सफल भए पनि केही कम्पनीहरूले बजार हिस्सामा गिरावट भोगेका छन्।