सेयर बजार तीन हजार बिन्दु पार,साढे १८ अर्बको कारोबार

काठमाडौं । नेपाली सेयर बजारले मंगलबार मनोवैज्ञानिक रूपमा महत्वपूर्ण मानिने तीन हजार बिन्दुको सीमा पार गरेको छ। नेपाल स्टक एक्सचेञ्ज (नेप्से) परिसूचक साताको तेस्रो कारोबार दिन ३०.४९ अंकले उकालो लागेर ३००१.८० बिन्दुमा रोकिएको छ।

यसअघि सोमबार नेप्से ७.१० अंकले बढेको थियो भने आइतबार १८.४४ अंकले घटेको थियो। त्यसभन्दा अगाडिका लगातार आठ दिनसम्म बजारमा वृद्धि भएको थियो, जसले लगानीकर्तामा उत्साह थपेको थियो।

मंगलबारको कारोबारमा कुल १८ अर्ब ५२ करोड रुपैयाँ बराबरको सेयर किनबेच भएको छ। अघिल्लो दिन सोमबारको कारोबार रकम भने १८ अर्ब ७५ करोड रुपैयाँ रहेको थियो।

मंगलबार कुल २५० कम्पनीको सेयर कारोबार हुँदा १७६ कम्पनीको सेयर मूल्य बढेको छ भने ७४ कम्पनीको सेयर मूल्य घटेको छ। बजारमा पुनः सकारात्मक संकेत देखिएसँगै लगानीकर्ताको मनोबल बलियो देखिएको छ।