चार प्रदेशमा ‘भारी वर्षा’ र पश्चिम तराईमा हुरीको सम्भावना

काठमाडौं । साउन २ गते शुक्रबार पनि देशभरका विभिन्न स्थानमा वर्षा हुने सम्भावना रहेको नेपाल मौसम पूर्वानुमान महाशाखाले जनाएको छ।

महाशाखाले बिहान ६ बजे जारी गरेको बुलेटिनअनुसार, कोसी, बागमती, गण्डकी र कर्णाली प्रदेशका पहाडी भूभागहरूमा केही स्थानहरूमा मेघगर्जन र चट्याङसहित हल्का देखि मध्यम वर्षा हुने देखिएको छ भने यी प्रदेशका एक-दुई स्थानमा भारी वर्षा पनि हुनसक्ने सम्भावना छ। साथै, देशका उच्च पहाडी तथा हिमाली भूभागका थोरै स्थानहरूमा हल्का देखि मध्यम वर्षा वा हिमपात हुनसक्ने जानकारी दिइएको छ। लुम्बिनी र सुदूरपश्चिम प्रदेशका तराई क्षेत्रमा भने हावाहुरीको जोखिम रहेको छ।

आज राति पनि कोसी प्रदेशका केही स्थान, मधेस प्रदेश र पहाडी भूभागका थोरै स्थानहरूमा मेघगर्जनसहित हल्का देखि मध्यम वर्षा हुने अनुमान छ भने उच्च पहाडी क्षेत्रहरूमा हल्का वर्षा वा हिमपातको सम्भावना देखिएको छ।

मौसमविद्हरूका अनुसार २४ घण्टाभित्र १० मिलिमिटरभन्दा कम पानी परे हल्का वर्षा, १० देखि ५० मिलिमिटर पानी परे मध्यम वर्षा, ५० देखि १०० मिलिमिटर पानी परे भारी वर्षा, १०० देखि २०० मिलिमिटर पानी परे धेरै भारी वर्षा र २०० मिलिमिटरभन्दा बढी पानी परे अति भारी वर्षा मानिनेछ।

वर्षाको क्षेत्रफल अनुसार पनि वर्गीकरण गरिएको छ—१० प्रतिशतभन्दा कम भूभागमा वर्षा भए ‘एक-दुई स्थानमा वर्षा’, १० देखि ३० प्रतिशतमा ‘थोरै ठाउँमा वर्षा’, ३० देखि ५० प्रतिशतमा ‘केही स्थानमा वर्षा’, ५० देखि ८० प्रतिशतमा ‘धेरै ठाउँमा वर्षा’ र ८० प्रतिशतभन्दा बढी क्षेत्रमा ‘अधिकांश स्थानमा वर्षा’ हुने देखिन्छ।

यसरी मौसम पूर्वानुमान महाशाखाले देशका विभिन्न भूभागमा आज पनि वर्षा हुने सम्भावना औँल्याउँदै सचेत रहन र आवश्यक तयारी गर्न आग्रह गरेको छ।