नेप्सेमा ३६ अंकको वृद्धि, साढे ९ अर्बको कारोबार

काठमाडौं  । साताको तेस्रो कारोबार दिन मंगलबार सेयर बजारमा उल्लेखनीय सुधार देखिएको छ। नेपाल स्टक एक्सचेञ्ज (नेप्से) सूचक ३६.८६ अंकले उकालो लाग्दै २,७६२.५७ बिन्दुमा पुगेको हो, जुन १.३५ प्रतिशतको वृद्धि हो।

सोमबार नेप्से ३५.०९ अंकले घटेर २,७२५.७१ मा झरेको थियो भने त्यसअघि लगातार तीन दिन बजारमा दोहोरो अंकको वृद्धि देखिएको थियो।

मंगलबारको कारोबारमा ९ अर्ब ४१ करोड रुपैयाँ बराबरको सेयर किनबेच भयो। अघिल्लो दिन सोमबार ७ अर्ब ९२ करोड र आइतबार ११ अर्ब १९ करोड रुपैयाँको कारोबार भएको थियो।

यो दिन नेप्सेमा सूचीकृत २०९ कम्पनीका सेयर मूल्य वृद्धि भए भने ३९ कम्पनीका सेयर घटे। सुपर मादी हाइड्रोपावर कम्पनीको सेयर मूल्य सबैभन्दा बढी ८.०८ प्रतिशतले उकालो लागेको छ।

समूहगत हिसाबले हेर्दा बैंकिङ समूह १.९२ प्रतिशतले, विकास बैंक १.५९ प्रतिशत, फाइनान्स १.८२ प्रतिशत, होटल तथा पर्यटन १.१५ प्रतिशत, र जलविद्युत् समूह १.६७ प्रतिशतले बढेका छन्।

त्यस्तै, लगानी समूहको सूचक १.३८ प्रतिशत र लघुवित्त समूह १.५५ प्रतिशतले उकालो लागेको छ। बजारको समग्र सुधारले लगानीकर्तामा उत्साह थपिएको देखिन्छ।