सौर्य बत्ती जडानमा भ्रष्टाचार, चक्रघट्टाका पूर्वअध्यक्ष सहित १० विरुद्ध मुद्दा

काठमाडौं । अख्तियार दुरुपयोग अनुसन्धान आयोगले सर्लाहीको चक्रघट्टा गाउँपालिकाका पूर्वअध्यक्ष विक्रम यादवसहित १० जनाविरुद्ध विशेष अदालतमा भ्रष्टाचार मुद्दा दायर गरेको छ ।

गैरकानूनी लाभ तथा हानी पुर्‍याई भ्रष्टाचार गरेको भन्दै आयोगले उनीहरूविरुद्ध अभियोग दर्ता गरेको हो । आयोगका अनुसार पूर्वअध्यक्ष यादव सहितको सङ्लग्नतामा सौर्य बत्ती जडानका लागि छुट्याइएको बजेटमा चरम अनियमितता भएको थियो ।

पालिकाभित्र वडा-१ देखि ९ सम्म सौर्य बत्ती जडान गर्ने योजना थियो। सोही अनुसार नौ वटा शीर्षकमा २ करोड १६ लाख रूपैयाँ बजेट विनियोजन गरेको थियो। त्यो योजनाको बजेटलाई संशोधन गरी दुई करोड ५३ लाख १८ हजार ८० रुपैयाँ बनाइएको थियो।