काठमाडौं सहित यी २९ जिल्लामा बाढीको खतरा, ११ जिल्लामा ‘एल्लो वारेन्ट’

काठमाडौं । बिहीबार वर्षासँगै देशका केही नदीमा पानीको बहाव बढ्ने पूर्वानुमान छ । नदीतटीय क्षेत्रमा सतर्कता अपनाउन बाढी पूर्वानुमान महाशाखाले आग्रह गरेको छ ।

बाढी महाशाखाले बिहीबार बिहान बुलेटिन जारी गरी यस दिन भोजपुर, गोरखा, लमजुङ, कास्की, पर्वत, बागलुङ, म्याग्दी, बझाङ, डोटी, डडेलधुरा र दार्चुला भई बहने नदीमा बहाव बढ्न सक्ने भन्दै बाढीको ‘मध्यम’ जोखिमको सम्भावना औँल्याइएको छ ।

इलाम, मोरङ, तेह्रथुम, पाँचधार, ताप्लेजुङ, संखुवासभा, खोटाङ, सोलुखुम्बु, दोलखा, सिन्धुपाल्चोक, रामेछाप, काभ्रे, ललितपुर, काठमाडौं, मकवानपुर, उदयपुर, चितवन र बैतडी भई बहने केही साना नदीमा समेत बहाव बढ्ने सक्ने महाशाखाको पूर्वानुमान छ ।

यीमध्ये पनि भोजपुर, गोरखा, लमजुङ, कास्की, पर्वत, बागलुङ, म्याग्दी, बझाङ, डोटी, डडेलधुरा र दार्चुला जिल्लाका लागि भने महाशाखाले पहेँलो रङ लगाएको छ अर्थात् ‘एल्लो वारेन्ट’ नै जारी गरेको छ। मौसमविद्का अनुसार पहेँलो रङ लगाउनुको अर्थ सामान्य जोखिमभन्दा अलि बढी मध्यम जोखिमको संकेत गर्नु हो।