आन्दोलनका कार्यक्रम फिर्तासँगै सार्वजनिक यातायात पुनः सञ्चालनमा

काठमाडौं । गण्डकी प्रदेशमा राइड सेयरिङ सेवा सम्बन्धी नियमावलीको विरोधमा आन्दोलनरत यातायात व्यवसायीले मंगलबार साँझपछि प्रदर्शन फिर्ता लिएका छन्। यससँगै प्रदेशभरका सार्वजनिक यातायात सेवा पुनः सञ्चालनमा आएका छन्।

मंगलबार साँझ गण्डकी प्रदेश सरकारले एक महिनाका लागि राइड सेयरिङसम्बन्धी नियमावली स्थगन गर्ने निर्णय गरेपछि व्यवसायीहरू आन्दोलित अवस्थाबाट पछि हटेका हुन्। यसअघि, राइड सेयरिङ एपहरूमाथि सरकारले ल्याएको नयाँ नियमावलीको विरोधमा यातायात व्यवसायीहरू आन्दोलनमा उत्रिएका थिए।

त्यसक्रममा यातायात व्यवसायी महासंघ र सरकारबीच भएको वार्ता सकारात्मक बनेको थियो। यही सहमतिका आधारमा व्यवसायीहरूले आन्दोलन फिर्ता लिएका हुन्।

राइड सेयरिङ सेवा सम्बन्धी नीति निर्माणको क्रममा सरोकारवालाको समावेशी सुझाव संकलन गरेर मात्र अगाडि बढ्ने सरकारले प्रतिबद्धता जनाएको छ।