दीपेन्द्र गौचनको निर्देशनमा फिल्म ‘मिसिङ्ग : केटी हराएको सूचना’ बन्ने

काठमाडौं । चर्चित निर्देशक दीपेन्द्र गौचनको निर्देशनमा फिल्म ‘मिसिङ्ग : केटी हराएको सूचना’ बन्ने भएको छ। नेपाली चलचित्रको परिवेश बदल्ने भिजन लिएर दुई दशकपछि नेपाल फर्किएका उनले नयाँ फिल्म निर्माण गर्ने घोषणा गरेका हुन्। 

ललितपुरस्थित लबिम मलको क्यूएफएक्स हलमा आयोजित कार्यक्रमबीच फिल्मको औपचारिक घोषणा गरिएको हो।

उजेलीः ए चाइल्ड ब्राइड इन नेपाल र विश्व फिल्म उद्योगमा योगदानका लागि प्रशंसित काम गरेका गौचनले आफ्नो नयाँ उद्यम ट्राइ–सिटी पिक्चर्सको साथ नेपाली चलचित्र क्षेत्रमा पुनस्प्रवेश गरेका छन्।

गौचन र नकिम उद्दिनले मिलेर स्थापना गरेको ट्राइ–सिटी पिक्चर्सले मनोरञ्जन मात्र नभई सामाजिक रूपमा प्रभाव पार्ने चलचित्र निर्माण गर्ने लक्ष्य राखेको छ।

गौचनको सन २०२५ को भिजनमा नेपाली सिनेमालाई एक फस्टाउँदो, विश्वव्यापी रूपमा मान्यता प्राप्त उद्योगमा रूपान्तरण गर्ने जनाएका छन। नेपालको तराई क्षेत्रको जीवन्त पृष्ठभूमिमा आधारित यस ब्यानर अन्तर्गतको पहिलो चलचित्र  ‘मिसिङ्गः केटी हराएको सूचना’ बनाउन लागिएको हो।

यस फिल्ममा पहाडी समुदायका युवा र मधेसी समुदायकी युवतीको रहनसहन र मेलमिलापको बारेमा कथा समेटिनेछ। फिल्मले तराई क्षेत्रको सौन्दर्य र संस्कृतिको विरुद्धमा रहेको पहाडी–मधेसी मेलमिलापको खोजी गर्छ।

फिल्मका लेखक तथा निर्माता समेत रहेका गौचनले चलचित्र मिसिङ्गको निर्माणका लागि पाएको प्रेरणाको बारेमा आफ्नो अनुभव सुनाए।

‘नेपाल फर्केर मैले धेरैजसो फिल्म पहाड र हिमाली क्षेत्रमा बनाइएको देखेँ। यी क्षेत्रहरू प्रतिष्ठित भए पनि म तराईको सौन्दर्य र यसको समृद्ध सांस्कृतिक विविधता देखाउन चाहन्थें। यो फिल्म मेरो मनको नजिक छ किनभने यसले पारम्परिक र जातीय सीमानाहरू पार गर्ने, विविधताको बीचमा समानता खोज्ने कुराको प्रतिनिधित्व गर्दछ,’उनले भने।

यस फिल्ममा सीताको भूमिकामा सृष्टि श्रेष्ठ रहेकी छन भने रामको भूमिकामा नाजिर हुसेन रहेका छन्। त्यसैगरी विलासको भूमिकामा संजय मिश्रा तथा अमितेश शाह (क्यामियो) टिकट बिक्रेताको रोलमा रहेका छन्। यस बाहेक जनकपुरबाट थप स्थानीय कलाकारहरूले विभिन्न भूमिका निभाएका छन्।

नकिम उद्दीन कार्यकारी निर्माता रहेको फिल्मलाई  अमर महर्जनले खिच्नेछन्।