लुम्बिनी सरकारको बजेट ४० अर्ब ४७ करोड

काठमाडौं । लुम्बिनी प्रदेश सरकारले आगामी आर्थिक वर्ष २०८०/८१ का लागि ४० अर्ब ४७ करोड बजेट ल्याएको छ।

प्रदेशका आर्थिक मामिलामन्त्री धनबहादुर मास्कीले शुक्रबार प्रदेश सभामा बजेट प्रस्तुत गरेका छन्। उनले आगामी आर्थिक वर्षका लागि ४० अर्ब ४७ करोड ८९ लाख ९७ लाख बजेट प्रस्तुत गरेका हुन्।

जसमा चालुतर्फ १३ अर्ब ६३ करोड ३० लाख ९९ हजार र पुँजिगततर्फ २३ अर्ब २५ करोड ६९ लाख एक हजार छुट्याइएको छ। त्यस्तै वित्तिय हस्तान्तरणतर्फ तीन अर्ब ५८ करोड ९७ लाख बजेट विनियोजन गरिएको छ। जुन चालु तर्फ ३३.६८ प्रतिशत, पुँजिगत तर्फ ५७.४५ प्रतिशत र वित्तिय हस्तान्तरणतर्फ ८.८७ प्रतिशत हो।

आगामी आर्थिक वर्षमा आन्तरिक राजश्वबाट ६ अर्ब ७३ करोड ५१ लाख, संघबाट प्राप्त हुने राजश्व बाँडफाँटबाट ११ अर्ब ३१ करोड ७४ लाख, संघबाट प्राप्त हुने रोयल्टी २९ करोड, स्थानीय तहबाट बाँडफाँट भई प्राप्त हुने राजश्व दुई अर्ब ५० करोड ३० लाख रुपैयाँ प्राप्त हुने अनुमान गरिएको छ।