एमाले र माओवादीले गोरु जुधाइ महोत्सवलाई विवादित बनाए !

काठमाडौं । परापूर्वकालदेखि माघ १ गते मनाइँदै आइएको जिल्लाको तारुकेश्वर गाउँपालिका–३ को गोरु जुधाइ महोत्सव यस वर्ष विवादमा परेको छ ।

आइतबार गोरु जुधाइका लागि प्रमुख अथिति, विशेष, अथिति लैजाँदा आर्थिक भार परेको भन्दै विवाद उत्पन्न भएको हो ।

कार्यक्रमका लागि नेपाली कांग्रेसका प्रवक्ता डा.प्रकाशशरण महत, नेपाली कांग्रेसका केन्द्रीय सदस्य एवं बागमती प्रदेश संसदीय दलका नेता बहादुर सिंह लामासहित पालिका अध्यक्ष शिवप्रसाद अधिकारी हेलिकोप्टरमार्फत काठमाडौंबाट कार्यक्रम स्थल पुगेका थिए । सो क्रममा पालिकाले गोरु जुधाइ पर्वका लागि छुट्टयाइएको १० लाख हेलिकोप्टरमा प्रयोगमा सकिएको भन्दै समाचारहरु बाहिर आएका छन् ।

सो प्रकरणबारे स्पष्टीकरण दिँदै पालिका अध्यक्ष शिवप्रसाद अधिकारीले झुटको खेति गरिएको भन्दै बिना तथ्य प्रमाण, राजनीतिक रोश र कुण्ठा व्यक्त गरिएको बताएका छन् ।

उनले सामाजिक सञ्जालमा लेखेका छन्, ‘बिना तथ्य, प्रमाण राजनीतिक रोश र कुण्ठा व्यक्त गर्नका लागि गरिएको त्यस्ता बनावटी समाचार र सामाजिक संजालमा लेखिएका स्टाट्प्रति गम्भिर आपत्ति जनाउँदै त्यस्ता झुटा प्रचार र पित पत्रकारिताको विश्वासमा नलाग्न पनि आमनागरिकलाई आग्रह गर्दछौं ।’

उनले गोरु जुधाइ पर्वका लागि पालिकाले ८ लाख रुपैयाँ विनियोजन गरेको र उक्त रकम हेलिकोप्टरका लागि नभइ गोरु पालक किसानको प्रोत्साहन र मेला व्यवस्थापनका लागि मात्रै खर्च गरिने बताए । त्यस्तै हेलिकोप्टरको खर्चका लागि भनिएको १० लाख रुपैयाँ आगामी वर्षदेखिका लागि छुट्टयाइएको तर यो वर्षका लागि नभएको समेत स्पष्ट पारेका छन् ।

‘गोरु जधाई महोत्वसको लागि पालिकाले ८ लाख रुपैयाँ बजेट बिनियोजन गरेको छ । त्यो मेला आयोजक समितिलाई गोरु पालक किसानहरुको प्रोत्साहन र मेला व्यवस्थापनका लागि मात्रै खर्च गरिने छ ।’, उनले भनेका छन्, ‘उक्त ८ लाख रुपैयाँ भुक्तानी समेत भइसकेको छैन् । र, जुन १० लाखको कुरा छ त्यो त हिजो आयोजित कार्यक्रममा मैले आगामी आर्थिक वर्षदेखि गोरुजुघाई मेलाको संरक्षण र प्रवद्र्धनका लागि छुट्याउने घोषणा मात्र गरेको हो । त्यो रकम यो वर्षको होइन ।’

त्यसैगरी महोत्सवका लागि पर्यटन बोर्डसँगको सहकार्यमा २ लाख रुपैयाँ आफूले व्यवस्था गरेको र विगतका वर्षदेखि नै प्रमुख अथिति र विशेष अथितिहरुलाई व्यक्तिगत पहलमा हेलिकोप्टरमा लैजाने गरेको अध्यक्ष अधिकारीले बताएका छन् । साथै हेलिकोप्टरका लागि खर्च भएको रकम पालिकाबाट नदिइएको उनले बताएका छन् ।

पर्यटन व्यवसायी एवं राजनीतिकर्मी अधिकारीले यसअघि पनि निरन्तर उक्त महोत्सवका लागि निजी खर्चमा हेलिकोप्टरबाट अथिति लैजाने गरेका थिए । तर अहिले नेकपा एमाले र माओवादीले मिडियालाई गलत प्रचारबाची गर्न लगाएर एतिहासिक महत्व बोकेको गोरु जुधाइ पर्वलाई बद्नाम गराउन खोजेको एक नेताले जानकारी दिए । पालिका अध्यक्ष नहुँदै अधिकारीले गोरु जुधाइ महोत्सवका लागि विभिन्न पहल गर्दै आउनु भएको थियो ।’ ती नेताले भने, ‘तर अहिले आएर उहाँलाई बद्नाम गराउन यस्तो प्रपञ्च गरिएको हो ।’