चालक अनुमतिपत्र लिन बुटवल धाउनुपर्ने बाध्यताको अन्त्य, अब पाल्पाबाटै सवारी लाइसेन्स

काठमाडौं । लुम्बिनी प्रदेश सरकारका श्रम तथा यातायात मन्त्रालयले  दुईपाङ्ग्रे सवारीसाधनको चालक अनुमतिपत्र पाल्पाबाटै दिन थालेको छ ।

पहाडी जिल्लामै पहिलोपटक यातायात व्यवस्था सेवा कार्यालयले पाल्पाबाट सवारी चालक अनुमतिपत्रसम्बन्धी सेवा सुरु गरेको हो।

सोमबार लुम्बिनी प्रदेश सरकारका श्रम तथा यातायात व्यवस्थामन्त्री पुरमती ढेँगाले तानसेन नगरपालिका–७ ठाँटीमा सो सेवाको शुभारम्भ गरे । उक्त सेवाको शुरुवातसँगै सवारी चालकको अनुमतिपत्र लिन बुटवल धाउनुपर्ने बाध्यता हटेको छ।

साना सवारीसाधनका लागि निर्माण हुने सवारी चालक अनुमतिपत्र परीक्षण केन्द्रमा काम सुरुआत भएसँगै चालु आर्थिक वर्षमा भवन निर्माणलगायतका काम हुनेछ। तीन करोड ५० लाख बजेट आवश्यक भए पनि यस वर्ष मन्त्रालयबाट रु एक करोड बजेट विनियोजन गरिएको छ।