कच्चा तेलको भाउ १ वर्ष यताकै सस्तो, प्रतिब्यारेल कतिमा झर्‍यो ?

काठमाडौं । अन्तर्राष्ट्रिय बजारमा कच्चा तेलको मूल्य घट्ने क्रम जारी छ । पछिल्लो दुई महिनामा विश्व बजारमा कच्चा तेलको भाउ २० प्रतिशत बढीले घटेको हो ।

विश्वभर देखिएको आर्थिक मन्दी र यरोपियन युनियनले रुसी तेलमा लगाएको ‘क्याप’का कारण अन्तर्राष्ट्रिय बजारमा कच्चातेलको भाउमा भारी गिरावट आएको हो ।

दुई महिनामै कच्चा तेलको भाउ प्रतिब्यारेल २५ डलरसम्म घटेको छ। गत नोभेम्बर ७ मा प्रतिब्यारेल ९७ डलरमा पुगेको ब्रेन्ट क्रुड आयलको मूल्य आज (जनवरी ८ ) ७३ डलरमा झरेको छ । यस ब्रेन्ट क्रुड आयलको मूल्य २५ प्रतिशतले घटेको हो ।यो पछिल्लो १ वर्ष यताकै कम हो ।

यसैगरी, ओपेक बेन्चमार्क डब्ल्यूटीआइ क्रुड आयलको १९ प्रतिशत अर्थात् १८ डलर घटेको छ । एक महिना अघि प्रतिब्यारेल ९१ डलर रहेको डब्ल्यूटीआइको भाउ आइतबार प्रतिब्यारेल ७३ डलरमा कारोबार भइरहेको छ।

२०२२ को फेब्रुअरीमा रुस युक्रेन युद्ध सुरु भएसँगै आकाशिएर प्रतिब्यारेल १३९ डलरसम्म पुगेको कच्चा तेलको भाउ मेदेखि ओरालो लागेको थियो । गत साता मात्रै ईयूले रुसी कच्चा तेलको भाउ प्रतिब्यारेल ६० डलर तोकेपछि अन्तर्राष्ट्रिय बजारमा त्यसको प्रभाव पर्न थालेको हो ।

अन्तर्राष्ट्रिय बजारमा कच्चा तेलको मूल्य घट्दा नेपाललाई पनि प्रत्यक्ष फाइदा हुन्छ । नेपालले अहिले सिधै अन्तर्राष्ट्रिय बजारबाट तेल खरिद नगरी भारतसँग खरिद गरेर ल्याउने गरेको छ । विश्व बजारमा कच्चा तेलको भाउ घट्दा भारतमा पनि घट्ने हुनाले त्यसको प्रभाव नेपालमा पनि पर्छ ।

विश्व बजारमा तेलको भाउ घटेसँगै भारतीय आयल निगमले पनि पछिल्लो समय लगातार भाउ घटाएर पठाउँदै आएको छ । गत आर्थिक वर्षमा आधा खर्ब बढी घाटा व्यहोरेको नेपाल आयल नियम तेलको भाउ घटेसँगै भदौ यता नाफामा जान थालेको छ ।

यद्यपि, भदौदेखि नाफामा जान थाले पनि निगमले भाउ भने घटाएको छैन । गत साता प्रधानमन्त्री पुष्पकमल दाहालले पेट्रोलियम पद्धार्थको भाउ घटाउन निर्देशन दिए पनि निगमले अझै घटाएको छैन ।