बागलुङ कांग्रेसको सभापतिमा सिटौला समूहका शेरचन विजयी

काठमाडौं । बागलुङ कांग्रेसको सभापतिमा जितबहादुर शेरचन निर्वाचित भएका छन्। गत शुक्रबारदेखि जारी अधिवेशनमा सभापतिका लागि ५१ प्रतिशत मत नआएपछि दोस्रो चरणको मतदान भएको थियो।

जितबहादुर कृष्णप्रसाद सिटौला समूहका हुन्। शेरचनले प्रतिस्पर्धी जगदीशचन्द्र उपाध्यायलाई १ सय ५ मतले हराएका हुन्। त्यहाँ १ हजार ६ सय ४९ खसेको थियो।

यसअघिको मतदानमा जगदीशचन्द्र उपाध्यायले ७ सय ९०, जित शेरचनले ६ सय ८६ र अर्का उम्मेदवार द्रोण कुँवरले १ सय ६४ मत पाएका थिए। कसैले पनि खसेको मतको ५१ प्रतिशत नल्याएपछि पुनः मतदान भएको हो।

विजयी सभापति शेरचन ताहाचल क्याम्पसका पूर्व स्ववियू सभापति हुन्।