स्वास्थ्यकर्मी, सेना र पत्रकारसहित पर्सामा थप ३४ जनामा देखियो कोरोना

काठमाडौं । पर्साको वीरगंजमा चिकित्सक, सेना, पत्रकार र थनुवासहित थप ३४ जनामा कोरोना संक्रमण पुष्टि भएको छ ।

नारायणी अस्पतालको प्रयोगशालामा गरिएको नमुना परीक्षणमा ६ महिला र २८ पुरुष गरी ३४ जनामा कोरोना संक्रमण देखिएको हो । संक्रमित मध्ये ४ जना महिला र ३० पुरुष रहेका छन् । संक्रमितहरु २ जना बाराका, एक जना सुर्खेतका र ३१ जना पर्साका हुन् ।

सुर्खेत घर भई नेशनल मेडिकल कलेजको क्वाटरमा बसी काम गर्ने २८ वर्षीया महिला डाक्टरमा संक्रमण देखिएको हो।

त्यस्तै, वीरगंज ११ रानीघाट घर भइ नारायणी बयोधा अस्पताल प्रालि गण्डकमा कार्यरत ३४ वर्षीय पुरुष डाक्टरमा पनि संक्रमण देखिएको नारायणी अस्पताल वीरगंजका मेडिकल सुपेरिटेन्डेन्ट डाक्टर मदनकुमार उपाध्यायले जानकारी दिए।

त्यसैगरी, नारायणी अस्पताल वीरगंजको फार्मेसीमा कार्यरत ३० र ४३ वर्षका दुई पुरुष, नारायणीकै पारामेडिक्सको कन्ट्याक्ट ट्रेसिङ्मा परेका २१, २७ वर्षका दुई गरी कूल चारजना स्वास्थ्यकर्मी पनि संक्रमत पुष्टि भएको छ ।

यस्तै चण्डीप्रसाद गण वीरगंज घण्टाघरमा कार्यरत एवं शव व्यवस्थापन टोलीमा खटेका २८, ३० र ३२ वर्षका तीन जना नेपाली सेनाका सिपाही पनि संक्रमित भएको डा उपाध्यायले जानकारी दिए ।

वीरगन्ज सञ्जाल अनलाइनका एक जना २२ वर्षीय सञ्चारकर्मी र वडा प्रहरी कार्यालय विर्तामा थुनुवामा रहेका २० वर्षे पुरुष पनि संक्रमण पुष्टि भएको छ ।