दक्षिण एसियाका ४० लाख बालबालिका बाढी पहिरोबाट प्रभावित रहेको युनिसेफको ठहर

काठमाडौं  । कोरोनाको चुनौतीको सामना गरिरहेका दक्षिण एसियाका ४० लाख बालबालिका बाढी पहिरोबाट प्रभावित बनेका छन् ।

संयुक्त राष्ट्र सङ्घीय बाल कोष युनिसेफका अनुसार बंगलादेश, भारत, नेपाल, र भुटानमा अविरल वर्षाको कारण सात सय बालबालिकाको ज्यान गएको छ भने ४० लाख बालबालिका प्रभावित भएका छन् ।

कोरोना महामारीको कारण उद्धार, राहत र पुनर्स्थापनामा थप समस्या भएको छ ।

सडक, पुल, रेल मार्ग तथा विमानस्थलमा पुगेको क्षतिका कारण थुप्रै क्षेत्रहरू पहुँचबाहिर रहेका कारण उद्धार राहतमा कठिनाइ भएको युनिसेफले जनाएको छ ।

युनिसेफले प्रभावित बालबालिका तथा परिवारहरूका तात्कालीन आवश्यकता पूरा गर्नको लागि सम्बन्धित सरकार र मानवीय सहायता संस्थासँग स्थलगत रूपमै निकट समन्वय गरिरहेको तर कोरोना महामारी तथा त्यसको नियन्त्रण र रोकथामका सावधानीहरू पालना गर्नुपर्ने हुँदा प्रतिकार्यलाई थप जटिल बनाइदिएको जनाएको छ ।

नेपालमा असार २५ गतेयताको बाढी पहिरोले २० जिल्लाका दश हजार जना प्रभावितमध्ये आधाजसो बालबालिका रहेका छन् । सात हजार पाँच सय बालबालिका विस्थापित भएका युनिसेफले जनाएको छ ।

बङ्गलादेशमा मात्रै बाढीबाट १३ लाख बालबालिकासहित २४ लाख मानिसहरू प्रभावित भएको अनुमान गरिएको छ ।

भारतमा विहार, असाम, उडिशा, गुजरात, महाराष्ट्र, मध्य प्रदेश, केरला, उत्तराखण्ड, उत्तर प्रदेश र पश्चिम बङ्गालमा गरी बाढीबाट प्रभावित ६० लाख मानिसमध्ये २४ लाख बालबालिका रहेको अनुमान गरिएको छ ।

भुटानमा मनसुनी वर्षा पश्चातको पहिरोले मुख्य राजमार्गको साथै जिल्लाहरू जोड्ने सडकहरूमा क्षति पुगेकोले यातायात तथा संचार सेवामा अवरोध सिर्जना गरिरहेको छ।

७ वटा सहायक नदी तथा तिनमा मिसिन आउने खहरेमा पानीको सतह बढेको कारणलेमाओ नदीमा अकस्मात आएको बाढीले हालसम्म सम्म ४ जना मानिसको ज्यान लिनुका साथै बालीनाली तथा पानी प्रशोधन केन्द्रमा समेत असर पारेको छ।

अहिले सम्म पनि पानीको वहाव उच्च रहेकोले माओ नदीमा फेरि पनि बाढी आउने जोखिम कायमै छ।

समग्र अर्थतन्त्र र शेयर बजारको नियमित अपडेटका लागि हाम्रो  फेसबुक पेजका  साथै ट्वीटर र युट्युबमा हामीलाई फलो गर्न सक्नुहुन्छ ।