नवनियुक्त आईजीपी शैलेश थापालाई दर्ज्यानी चिह्न प्रदान

काठमाडौं । नवनियुक्त प्रहरी महानिरीक्षक शैलेश थापा क्षेत्रीले कार्यभार सम्हालेका छन् । 

बिहीबार बिहान गृह सचिव महेश्वर न्यौपानेले दर्ज्यानी चिन्ह प्रदान गरेलगत्तै थापा प्रहरी मुख्यालय पुगेर कार्यभार ग्रहण गरेका हुन । गृह मन्त्रालयमा आयोजित कार्यक्रममा सचिव न्यौपानेले महानिरीक्षक क्षेत्रीलाई दर्ज्यानी चिन्ह प्रदान गरेका थिए ।

थापासँग विभिन्न जिल्लाको प्रहरी प्रमुख भई काम गरेको अनुभव छ भने महानगरीय प्रहरी कार्यालय रानीपोखरी तथा केन्द्रीय प्रहरी प्रवक्ताको जिम्मेवारी पनि सम्हालेका थिए ।

यस्तै थापाले राष्ट्रिय प्रहरी प्रशिक्षण प्रतिष्ठान महाराजगञ्ज र प्रहरी महानिरीक्षकको सचिवालयमा बसेर समेत काम गरेका थिए  । २०४९ साल वैशाख १९ गते प्रहरी निरीक्षकबाट सेवा प्रवेश गरेका थापा अब भने २०७९ वैशाख १८ गतेसम्म प्रहरीको नेतृत्व सम्हाल्ने छन् ।

थापा नेपाल प्रहरीको २८ औं महानिरीक्षकमा मंगलबार बढुवा भएका थिए । निवर्तमान प्रहरी महानिरीक्षक ठाकुर ज्ञवालीले अवकाश पाएपछि बुधबार बिदाई भइसकेका छन् ।